සිරිමාවෝ වර්ණ ප්‍රදානෝත්සවයේ උණුසුම් පුවත: සම්ප්‍රදාය සහ "Gen Z" හඬ අතර ගැටුමක්ද?

 

කොළඹ 07 සිරිමාවෝ බණ්ඩාරනායක විද්‍යාලයේ මෑතකදී පැවති වර්ණ ප්‍රදානෝත්සවය, හුදෙක් සම්මාන බෙදාදුන් උත්සවයක් පමනක් නොවී මුළු රටේම අවධානය දිනාගත් සමාජ සංවාදයක ආරම්භය බවට පත් විය. වසර හතකට පසු ඉතා උත්කර්ෂවත් අන්දමින් සංවිධානය කර තිබූ මෙම උළෙල ආන්දෝලනාත්මක මුහුණුවරක් ගත්තේ, එම පාසලේම කීර්තිමත් ක්‍රීඩිකාවක වූ චනිත්මා සිනාලි මෙනෙවිය වේදිකාව මතදී සිදුකළ සෘජු ප්‍රකාශයත් සමඟය. මෙය පාසල් පද්ධතිය තුළ පවතින විනය නීති සහ සිසුන්ගේ අයිතිවාසිකම් පිළිබඳ අලුත් මාවතක සාකච්ඡාවක් නිර්මාණය කර තිබේ.

සිද්ධිය සැකෙවින් පෙළගැසෙන්නේ මෙසේය. 2023 වසරේ පාසල් ක්‍රීඩා නායිකාව මෙන්ම ස්කොෂ් ක්‍රීඩාවෙන් ජාත්‍යන්තර ජයග්‍රහණ රැසක් අත්පත් කරගත් චනිත්මා, තමන්ට හිමිවිය යුතු ඉහළම ඇගයීමක් අසාධාරණ ලෙස අහිමි වූ බව පවසමින් උත්සව සභාව මැද මයික්‍රෆෝනය අතට ගත්තාය. ඇය පෙන්වා දුන්නේ පොදු රාජ්‍ය මණ්ඩලීය ක්‍රීඩා උළෙල සහ ආසියානු ක්‍රීඩා උළෙල නියෝජනය කළ එකම පාසල් සිසුවිය තමන් වුවද, එදින උදෑසන පැවති පෙරහුරුවකට (Rehearsal) සහභාගී නොවීම යන තාක්ෂණික හේතුව මත තමන්ගේ සම්මානය වෙනත් අයෙකුට පිරිනමා ඇති බවයි. විශේෂයෙන්ම තමන් එම අවස්ථාවේ විභාගයකට පෙනී සිටි බවත්, ඒ පිළිබඳව ගුරුවරුන් දැනුවත් කර තිබූ බවත් ඇය අවධාරණය කළාය.

මෙම සිදුවීම සමාජ මාධ්‍ය තුළ දැඩි කථාබහට ලක්වූයේ "Gen Z" පරම්පරාවේ නිර්භීතකම විදහා දක්වන අවස්ථාවක් ලෙසය. අතීතයේදී මෙන් නොව, තමන්ට සිදුවන අසාධාරණය හමුවේ බලධාරීන් ඉදිරියේ වුවද නොබියව හඬ නැගීමට වර්තමාන දරුවන් සතු ශක්තිය බොහෝ දෙනාගේ ඇගයීමට ලක්විය. විභාගයක් වැනි අනිවාර්ය කටයුත්තක් නිසා පෙරහුරුවකට නොපැමිණීම, ජාත්‍යන්තර මට්ටමේ දක්ෂතා දැක්වූ දරුවෙකුට දඬුවම් කිරීමට හේතුවක් කරගැනීම නුසුදුසු බව බොහෝ දෙනාගේ මතය විය.

කෙසේ වෙතත්, සිරිමාවෝ බණ්ඩාරනායක විද්‍යාලයීය පාසල් ප්‍රජාව මේ සම්බන්ධයෙන් නිල නිවේදනයක් නිකුත් කරමින් සිය පාර්ශවය පැහැදිලි කර තිබේ. ඔවුන් පවසන්නේ "විශිෂ්ටතම ක්‍රීඩිකාව" සම්මානය පිරිනමනු ලබන්නේ පූර්වයෙන් දැනුම් දුන් නිශ්චිත නිර්ණායක පද්ධතියකට අනුව බවයි. ඒ අනුව, අදාළ සම්මානය දිනාගත් පිහිනුම් ශූරී නභාෂි පෙරේරා සිසුවිය, චනිත්මාට වඩා ඉහළ ලකුණු ප්‍රමාණයක් අදාළ නිර්ණායක යටතේ ලබා සිටි බව පාසල අවධාරණය කරයි. චනිත්මාගේ ප්‍රකාශය නිසා සම්මානය දිනාගත් නභාෂි සිසුවියට සමාජ මාධ්‍ය හරහා අනිසි පීඩනයක් එල්ල වීම කණගාටුදායක තත්ත්වයක් බවද මෙහිදී අමතක නොකළ යුතුය.

මෙම සිද්ධිය දෙස මැදහත් සිතින් බැලීමේදී කරුණු කිහිපයක් පැහැදිලි වේ. පාසලක් ලෙස විනය පවත්වාගෙන යාම සහ සම්ප්‍රදායන් රැකගැනීම වැදගත් වුවද, දරුවන් සමඟ පවතින සන්නිවේදනයේ පරතරය මෙවැනි ගැටුම් වලට මූලික හේතුව වී තිබේ. තමන්ට සම්මානය නොලැබීමට හේතුව නිසි පරිදි සන්නිවේදනය වී තිබුණේ නම්, ජාත්‍යන්තරය දිනූ ක්‍රීඩිකාවකට මෙලෙස කලකිරීමට පත්වීමට ඉඩක් ඉතිරි නොවනු ඇත. එමෙන්ම, විනය නීති යනු දරුවන් දිරිගැන්වීමට මිස ඔවුන් අධෛර්යමත් කිරීමට භාවිතා කරන මෙවලමක් නොවිය යුතු බව අධ්‍යාපන ක්ෂේත්‍රයේ ප්‍රවීණයන් පෙන්වා දෙයි.

අවසාන වශයෙන්, සිරිමාවෝ විද්‍යාලයේ මෙම සිදුවීම මුළු මහත් පාසල් පද්ධතියටම වටිනා පාඩමක් කියා දෙයි. එය සම්ප්‍රදාය සහ නූතන නිදහස් චින්තනය අතර පවතින ගැටුමේ එක් සන්ධිස්ථානයකි. දක්ෂ දරුවන් ඇගයීමේදී වඩාත් පාරදෘශ්‍ය ක්‍රමවේදයක් අනුගමනය කිරීමත්, තාක්ෂණික කරුණු වලට වඩා මානුෂීය සහ සාධාරණත්වය අගය කිරීමත් අනාගතයේදී මෙවැනි අමිහිරි සිදුවීම් වළක්වා ගැනීමට මහෝපකාරී වනු ඇත.