ඊශ්රායලය සහ ඇමරිකානු ඒකාබද්ධ හමුදා ඉරානයට එරෙහිව ආරම්භ කළ යුද මෙහෙයුමට අද වන විට දින 17ක් සපිරී තිබේ. මෙම යුදමය වාතාවරණයත් සමඟ මැදපෙරදිග කලාපය පුරා දැඩි නොසන්සුන්කාරී තත්ත්වයක් වර්ධනය වී ඇති අතර, ඉරාන අගනුවර වන ටෙහෙරානය වෙත ඊශ්රායලය විසින් මේ වන විට පුළුල් ප්රහාර මාලාවක් දියත් කරමින් සිටින බව වාර්තා වේ. විශේෂයෙන්ම ටෙහෙරානයේ ඉන්ධන ගබඩා ඉලක්ක කර ගනිමින් එල්ල වූ ප්රහාර "පරිසර සංහාරයක්" ලෙස හඳුන්වමින් ඉරාන විදේශ අමාත්ය අබ්බාස් අරග්චි ජාත්යන්තරය හමුවේ සිය දැඩි විරෝධය පළ කර ඇත.
මේ අතර ලෝකයේ කාර්යබහුලම තෙල් ප්රවාහන මාර්ගය වන හෝමූස් සමුද්ර සන්ධිය ඉරානය විසින් වසා දැමීමත් සමඟ ගෝලීය බලශක්ති අර්බුදයක් නිර්මාණය වීමේ අවදානමක් මතුව තිබේ. ලෝක තෙල් සැපයුමෙන් 20%ක් පමණ ගමන් ගන්නා මෙම මුහුදු තීරය යළි විවෘත කිරීම සඳහා සහාය වන ලෙස ජනාධිපති ඩොනල්ඩ් ට්රම්ප් චීනය, ප්රංශය සහ එක්සත් රාජධානිය ඇතුළු රටවල් කිහිපයකින් ඉල්ලීම් කර ඇත. එහෙත් එම ඉල්ලීම්වලට මෙතෙක් නිසි ප්රතිචාරයක් ලැබී නොමැති අතර, මෙම තත්ත්වය හමුවේ යුරෝපය පුරා ඉන්ධන මිල 20%කින් පමණ ඉහළ ගොස් ඇති බව වාර්තා වේ.
ගුවන් ගමන් ක්ෂේත්රයට ද මෙම යුද්ධයේ සෙවනැලි දැඩිව එල්ල වී තිබේ. ඩුබායි ජාත්යන්තර ගුවන්තොටුපොළ ආසන්නයේ ඇති ඉන්ධන ටැංකියකට එල්ල වූ ඩ්රෝන ප්රහාරයක් හේතුවෙන් හටගත් ගින්න පාලනය කිරීමට බලධාරීන් පියවර ගත් අතර, පූර්ව ආරක්ෂක පියවරක් ලෙස ගුවන්තොටුපොළේ කටයුතු තාවකාලිකව අත්හිටුවීමට ද තීරණය කෙරිණි. එසේම කුවේට් ගුවන් සීමාවට ඇතුළු වූ ඩ්රෝන යානා දෙකක් බිම හෙළීමට එරට ආරක්ෂක අංශ සමත් වී ඇති අතර, ලෙබනනයේ බේරූට් නුවර ඉලක්ක කර ගනිමින් ද ඊශ්රායලය ගුවන් ප්රහාර එල්ල කර ඇත.
යුද ගැටුම් හේතුවෙන් සිදුවන ජීවිත හානි දිනෙන් දින ඉහළ යමින් පවතින බව වාර්තා වේ. ඇමරිකානු ටෝපිඩෝ ප්රහාරයකින් ගිලී ගිය ඉරාන නෞකාවේ සිටි නාවිකයන් 84 දෙනෙකු වෙනුවෙන් ටෙහෙරාන් නුවරදී විශේෂ අවමංගල්ය උත්සවයක් පැවැත්වීමට නියමිතය. තවද, ඉරානය තුළ ඊශ්රායලයට ඔත්තු බැලූ බවට සැකපිට පුද්ගලයන් 500කට වැඩි පිරිසක් අත්අඩංගුවට ගෙන ඇති බවත්, ඉරාකයේ පිහිටි ඉරාන හිතවාදී මූලස්ථාන වෙත එල්ල වූ ප්රහාරවලින් පුද්ගලයන් තුවාල ලබා ඇති බවත් වාර්තා වේ. මෙම තත්ත්වය හමුවේ මැදපෙරදිග කලාපය දැඩි අස්ථාවරත්වයකට මුහුණ දී සිටින බව විදෙස් විශ්ලේෂකයෝ පවසති.
.png)
.jpg)
0 Comments