කළුතර හිටපු දුෂණ මර්දන ප්‍රධානියෙකුගේ නිවස බිඳ මිල අධික දේපළ රැසක් සොරකම් කරයි

 

කළුතර දිස්ත්‍රික්කයේ ආන්දෝලනාත්මක සිදුවීමක් වාර්තා වෙයි. කළුතර කොට්ඨාස දුෂණ මර්දන අංශයේ හිටපු ස්ථානාධිපතිවරයෙකුට අයත් නිවසක් බිඳ, විශාල වටිනාකමකින් යුත් දේපළ තොගයක් සොරකම් කර ඇති බව කළුතර දකුණ පොලිසිය පවසයි. මෙම නිවස කළුතර නාගොඩ ප්‍රදේශයේ පිහිටි ක්වින්ස් රෙසිඩන්ස් හි පිහිටා ඇත.

මෙම සොරකම හේතුවෙන් රුපියල් ලක්ෂ 9 කට ආසන්න මුදලක් සහ තවත් වටිනා දේපළ රැසක් අස්ථානගත වී තිබේ. සොරකම් කරන ලද භාණ්ඩ අතර රුපියල් 373,000 ක මුදලට අමතරව, රුපියල් 270,000 ක් පමණ වටිනා අත් ඔරලෝසු තුනක් ද ඇතුළත් ය. තවද, කැරට් එකට අඩු කුඩා ප්‍රමාණයේ මැණික් ගල් 150 ක්, නවීන ස්මාට් ජංගම දුරකථන දෙකක් සහ විදේශීය මත්පැන් වර්ග 17 කින් යුත් බෝතල් තොගයක් ද මෙලෙස සොරුන් විසින් රැගෙන ගොස් ඇත. දේශීය මත්පැන් වර්ගයක් වන තල් අරක්කු බෝතල් දෙකක් ද සොරකම් කරන ලද දේ අතර වන බව පොලිස් වාර්තා සඳහන් කරයි.

මෙම සිද්ධියට මුහුණ දුන් උප පොලිස් පරීක්ෂකවරයා වර්තමානයේ වැල්වැටිතුරේ පොලිස් ස්ථානයේ සේවය කරන අයෙකි. උණ රෝගය වැළඳීම හේතුවෙන් දින කිහිපයක් තිස්සේ ඔහු සිය නිවසේ තනිවම නේවාසිකව ප්‍රතිකාර ලබමින් සිට ඇත. පසුගිය 5 වන දින වැඩිදුර ප්‍රතිකාර සඳහා කළුතර නගරයේ පෞද්ගලික වෛද්‍යවරයකු හමුවීමට ඔහු පිටත්ව ගොස් තිබේ.

නිලධාරීවරයා නැවතත් සිය නිවසට පැමිණ ඇත්තේ එදින රාත්‍රී 10.30 ට පමණ ය. ඥාතිවරයකුගේ ආරවුලක් සම්බන්ධයෙන් දුරකථනයෙන් ලැබුණු දැනුම් දීමකට අනුව ඔහු කඩිනමින් නිවසට පැමිණ ඇත. නිවසට පැමිණි අවස්ථාවේදී නිවසේ දොර විවෘතව තිබීම නිසා ඔහු සැක සිතා වැඩිදුර පරීක්ෂා කර තිබේ.

පරීක්ෂා කිරීමේදී, නිවසේ දකුණු පස පිහිටි ජනේලයක් කඩා යම් පුද්ගලයෙකු නිවසට ඇතුළු වී ඇති බව අනාවරණය විය. නිවස ඇතුළත සියලුම දේපල අවුල් කර දමා තිබූ අතර, අල්මාරිය, කණ්ණාඩිය සහ මේසය මත තිබූ අත් ඔරලෝසු, සාලයේ ටී පෝව මත තිබූ ඔරලෝසු සහ අනෙකුත් වටිනා දේපළ සොරාගෙන ඇති බවට පැමිණිල්ලේ සඳහන් වේ. මෙම සොරකම සම්බන්ධයෙන් කළුතර දකුණ පොලිසිය මේ වන විට වැඩිදුර විමර්ශන කටයුතු සිදු කරමින් සිටී.