6 ශ්රේණියේ සිසුන් සඳහා අලුතින් හඳුන්වා දුන් ඉංග්රීසි භාෂා මොඩියුලයක අඩංගු වූ නුසුදුසු වෙබ් අඩවි යොමුවක් (Web Link) සම්බන්ධයෙන් වහාම ක්රියාත්මක වන පරිදි විමර්ශනයක් ආරම්භ කිරීමට අධ්යාපන අමාත්යාංශය පියවර ගෙන තිබේ. මහජනතාව සහ සමාජ ක්රියාකාරීන් විසින් පෙන්වා දෙන ලද බරපතල කරුණක් සැලකිල්ලට ගනිමින් අමාත්යාංශය මෙම තීරණයට එළඹ ඇත.
මෙම සිදුවීම මුලින්ම අනාවරණය වූයේ සමාජ ක්රියාකාරිනියක වන තිළිණි ශැල්වින් විසින් සිදු කළ අනාවරණයකට අනුවය. ඇය පෙන්වා දී තිබුණේ නව විෂය නිර්දේශයට අදාළ ග්රන්ථයේ ස්ථාන තුනක සිදුව ඇති අකුරු වැරදීමක් (Typing Error) හේතුවෙන්, සිසුන්ට ලබා දී ඇති අධ්යාපනික වෙබ් අඩවිය වෙනුවට සම්පූර්ණයෙන්ම නුසුදුසු වෙනත් වෙබ් අඩවියකට පරිශීලකයින් යොමුවන බවයි. පසුව සිදු කළ සොයා බැලීම්වලදී තහවුරු වී ඇත්තේ අදාළ වැරදි යොමුව හරහා සමලිංගික ප්රජාවට අදාළ අන්තර්ගතයන් සහිත වෙබ් අඩවියකට ප්රවේශ වන බවයි.
ජාතික අධ්යාපන ආයතනය විසින් සම්පාදනය කරන ලද මෙම මොඩියුලය සම්බන්ධයෙන් ලද පැමිණිල්ල සත්ය බව මූලික විමර්ශනවලදී තහවුරු වී ඇත. ඒ අනුව, අදාළ මුද්රිත පිටපත් බෙදාහැරීම වහාම අත්හිටුවීමට අධ්යාපන අමාත්යාංශය කටයුතු කර තිබේ. මෙම බරපතල අතපසුවීමට වගකිව යුතු පුද්ගලයන් කවුරුන්ද යන්න හඳුනාගැනීම සඳහා මේ වන විටත් පුළුල් පරීක්ෂණයක් ක්රියාත්මක වේ.
මේ පිළිබඳව අදහස් දක්වමින් අධ්යාපන අමාත්යාංශයේ ලේකම් නාලක කලුවැව මහතා ප්රකාශ කළේ, මෙම සිදුවීම සම්බන්ධයෙන් ඉදිරියේදී අපරාධ පරීක්ෂණ දෙපාර්තමේන්තුවට (CID) පැමිණිල්ලක් ඉදිරිපත් කිරීමට බලාපොරොත්තු වන බවයි. රජයේ අධ්යාපන ප්රකාශන සම්බන්ධයෙන් මෙවැනි වැරදි සිදුවීම දරුවන්ගේ අධ්යාපනයට මෙන්ම සදාචාරයට ද බලපාන බැවින්, පරීක්ෂණ වාර්තා මත පදනම්ව දැඩි ක්රියාමාර්ග ගන්නා බවද ඔහු අවධාරණය කළේය.
අනාගතයේදී විෂය නිර්දේශ ප්රතිසංස්කරණය කිරීමේදී සහ පෙළපොත් මුද්රණය කිරීමේදී මෙවැනි තාක්ෂණික හෝ අන්තර්ගතමය දෝෂ නැවත සිදු නොවීමට අවශ්ය විධිමත් පාලන ක්රමවේදයක් හඳුන්වා දීමට ද අමාත්යාංශය සැලසුම් කර ඇත. සිසුන්ගේ අධ්යාපන ද්රව්යවල ගුණාත්මකභාවය සහ සුරක්ෂිතභාවය තහවුරු කිරීම රජයේ ප්රමුඛතම වගකීමක් බවද මෙහිදී වැඩිදුරටත් සඳහන් විය.
.jpg)
.png)
0 Comments