නැවතත් මා ඔය අසබඩ අලි රස විඳිමු: පින්නවල අලි ඇතුන්ගේ දිය නෑම යළි ඇරඹේ

 

පින්නවල අලි අනාථාගාරය කියන්නේ දෙස් විදෙස් සංචාරකයින්ගේ නොමඳ ආකර්ෂණය දිනාගත් අපූරු ස්ථානයක්. එහි පැමිණෙන බොහෝ දෙනෙක් වඩාත්ම ආස කරන්නේ අලි ඇතුන් රංචු පිටින් මා ඔයට පැමිණ දිය කෙළියේ යෙදෙන දර්ශනය නැරඹීමටයි. පසුගිය දිනවල දිවයිනට බලපෑ අයහපත් කාලගුණික තත්ත්වය හේතුවෙන් තාවකාලිකව නවත්වා තිබූ මෙම සුන්දර අත්දැකීම දැන් යළිත් විඳගැනීමට අවස්ථාව උදා වී ඇති බව ජාතික සත්වෝද්‍යාන දෙපාර්තමේන්තුව නිල වශයෙන් නිවේදනය කර තිබේ.

අයහපත් කාලගුණයත් සමඟ මා ඔයේ ජල මට්ටම ඉහළ ගොස් ජලය බොරවීම පමණක් නොව, ගංවතුර සමඟ පැමිණි වැලි සහ රොන්මඩ අලි ඇතුන් නාවන ස්ථානවල තැන්පත් වී තිබුණි. මෙම වැලි තට්ටු අතර අලි ඇතුන්ගේ පාදවලට හානිකර විය හැකි වීදුරු කැබලි සහ යකඩ කැබලි වැනි අනතුරුදායක ද්‍රව්‍ය රැඳී ඇති බව නිරීක්ෂණය විය. සතුන්ගේ ආරක්ෂාව සහ සුබසාධනය පිළිබඳව දැඩි අවධානයක් යොමු කරමින්, බලධාරීන් තීරණය කළේ තත්ත්වය යහපත් වන තෙක් අලි ඇතුන් ඔය වෙත රැගෙන යාම තාවකාලිකව සීමා කිරීමටයි.

මෙම ගැටලුවට කඩිනම් විසඳුම් ලබාදීම සඳහා පින්නවල අලි අනාථාගාර බලධාරීන් වාරිමාර්ග දෙපාර්තමේන්තුවේ ද සහාය ඇතිව විශේෂ පිරිසිදු කිරීමේ මෙහෙයුමක් දියත් කරන ලදී. එහිදී එක්ස්කැවේටර් යන්ත්‍ර යොදාගනිමින් අලි නාවන ස්ථානයේ රැඳී තිබූ වැලි, රොන්මඩ සහ අනෙකුත් සියලු අපද්‍රව්‍ය ඉවත් කර එම ස්ථානය සතුන්ට ආරක්ෂිත පරිශ්‍රයක් බවට පත් කිරීමට කටයුතු කෙරිණි.

සියලු පිරිසිදු කිරීම් අවසන් කිරීමෙන් අනතුරුව, පසුගිය 24 වැනිදා සිට අලි ඇතුන් සාමාන්‍ය පරිදි සුපුරුදු වේලාවන්හිදී මා ඔය වෙත දිය නෑම සඳහා රැගෙන යාම නැවත ආරම්භ කර ඇත. එබැවින්, පින්නවල සුන්දරත්වය අත්විඳීමට බලාපොරොත්තුවෙන් සිටින සංචාරකයින්ට දැන් කිසිදු බාධාවකින් තොරව අලි ඇතුන්ගේ දිය කෙළිය නැරඹීමට අවස්ථාව ලැබෙනු ඇත.