ශ්රී ලංකාවේ දිස්ත්රික්ක 25ටම දැඩි ලෙස බලපෑ ආපදා තත්ත්වය හේතුවෙන් ඇති වූ හානිය පිළිබඳව නවතම වාර්තා නිකුත් වී තිබෙනවා. ආපදා කළමනාකරණ මධ්යස්ථානය (DMC) විසින් නිකුත් කරන ලද නිවේදනයට අනුව, මෙම දරුණු තත්ත්වය හේතුවෙන් මරණ සංඛ්යාව 607ක් දක්වා ඉහළ ගොස් ඇති බව තහවුරු වී තිබේ.
මෙම අතිශය දුක්බර සිදුවීමෙන් තවත් පුද්ගලයින් 214ක් අතුරුදන්ව සිටින අතර, මේ වන විටත් ඔවුන් සොයා මෙහෙයුම් ක්රියාත්මක වේ. සමස්තයක් ලෙස ගත් කළ පවුල් 586,464කට අයත් පුද්ගලයින් 2,082,195ක් මෙම ආපදාවෙන් සෘජුවම පීඩාවට පත්ව සිටින බව වාර්තා වේ.
වැඩිම හානිය මහනුවරට
ආපදා කළමනාකරණ මධ්යස්ථානයේ වාර්තාවලට අනුව, මෙම ආපදා තත්ත්වයෙන් වැඩිම මරණ සංඛ්යාව වාර්තා වී ඇත්තේ මහනුවර දිස්ත්රික්කයෙන් වන අතර, එම සංඛ්යාව 232ක් වේ. අනෙකුත් දිස්ත්රික්කවලින් වාර්තා වන මරණ සංඛ්යාවන් සැලකීමේදී, නුවරඑළියෙන් 89ක්, බදුල්ලෙන් 83ක්, කුරුණෑගලින් 61ක්, කෑගල්ලෙන් 30ක්, පුත්තලමෙන් 30ක් සහ මාතලේ දිස්ත්රික්කයෙන් 28ක් ලෙස දැක්වේ.
අතුරුදන් වූවන්ගේ තත්ත්වය
මරණ සංඛ්යාවට අමතරව, අතුරුදන් වූ පුද්ගලයින් සම්බන්ධයෙන්ද වැඩිම සංඛ්යාවක් මහනුවරින් (81) වාර්තා වී තිබේ. ඊට අමතරව කෑගල්ලෙන් 41ක්, නුවරඑළියෙන් 35ක්, බදුල්ලෙන් 28ක් සහ කුරුණෑගලින් 11ක් ලෙස අතුරුදන් වූ පුද්ගලයින්ගේ සංඛ්යාවන් වාර්තා වී ඇත.
දැනට පවතින තත්ත්වය අනුව, පවුල් 43,715කට අයත් පුද්ගලයින් 152,537ක් තවමත් දිවයින පුරා ස්ථාපිත කර ඇති සුරක්ෂිත මධ්යස්ථානවල රැඳී සිටින බව ආපදා කළමනාකරණ මධ්යස්ථානය විසින් නිකුත් කරන ලද නවතම නිවේදනයේ වැඩිදුරටත් සඳහන් වේ. මෙම ආපදා තත්ත්වයෙන් පීඩාවට පත් ජනතාවට සහන සැලසීමේ කටයුතු මේ වන විටත් ක්රියාත්මක වෙමින් පවතියි.
0 Comments