පෙම් සබඳතා වෙනුවෙන් සොරකමේ ගිය 18 හැවිරිදි තරුණයා සහ අසුවුණු මැණික් 61

 

සොරකම් කරන ලද මුදල් සිය පෙම්වතියන්ට තෑගි දීමටත්, අන්තර්ජාලය ඔස්සේ මුදල් ආයෝජන කටයුතු සඳහා යොදා ගැනීමටත් පුරුදුව සිටි 18 හැවිරිදි තරුණයෙක් බස්නාහිර උතුර අපරාධ කොට්ඨාසය විසින් අත්අඩංගුවට ගෙන තිබේ.

මෙම සැකකරු අත්අඩංගුවට ගෙන ඇත්තේ කොළඹ පිහිටි සුපිරි වෙළඳ සංකීර්ණයක් තුළදීය. පොලිසිය සඳහන් කළේ, ඔහු අත්අඩංගුවට ගන්නා අවස්ථාව වන විටත්, සිය ඥාතියෙකුගේ නිවසින් සොරාගත් බවට සැකකෙරෙන වටිනා මැණික් ගල් 61ක් ඔහුගේ භාරයේ තිබී සොයා ගත් බවයි.

පොලිස් විමර්ශනවලදී තරුණයාගේ මෙම ක්‍රියාකලාපය පිළිබඳව තවදුරටත් තොරතුරු අනාවරණය වී ඇත. ඔහු සොරකම් කළ මුදල් යොදා ගනිමින්, තමාගේ පෙම්වතියන් තිදෙනෙකුට ජංගම දුරකතන ඇතුළු තෑගි ලබා දී තිබේ. එම පෙම්වතියන් අතරට වයස අවුරුදු 27ක් වන, දරුවන් තිදෙනෙකුගේ මවක් මෙන්ම, 'ටික් ටොක්' (TikTok) සමාජ මාධ්‍යය ඔස්සේ හඳුනාගත් තවත් පෙම්වතියන් දෙදෙනෙකු ද අයත් වන බව වාර්තා වේ.

මෙම සුවිශේෂී සිදුවීම සම්බන්ධයෙන් වන වැඩිදුර විමර්ශන කටයුතු, බස්නාහිර උතුර අපරාධ කොට්ඨාසය භාර සහකාර පොලිස් අධිකාරී රොහාන් ඕලුගල මහතාගේ අධීක්ෂණය යටතේ, එහි ස්ථානාධිපති ප්‍රධාන පොලිස් පරීක්ෂක ලින්ටන් සිල්වා මහතාගේ උපදෙස් මත මේ වන විට ක්‍රියාත්මක වෙමින් පවතී.