මෑත කාලීනව සමාජ මාධ්ය ජාලාවන් ඔස්සේ දැඩි ආන්දෝලනයකට තුඩු දුන් පුවතක් වූයේ හෙළයේ මහා ගත්කරු මාර්ටින් වික්රමසිංහ සූරීන් හට උපකාරක පන්ති ගුරුවරයෙකු විසින් සිදුකළ අගෞරවනීය ප්රකාශයකි. 'චෙගුරා' යන අන්වර්ථ නාමයෙන් පෙනී සිටිමින් රසායන විද්යාව උගන්වන තමීර හේරත් ජයසිංහ නැමැති මෙම ගුරුවරයා, අන්තර්ජාලය ඔස්සේ පැවැත්වූ පන්තියක් අතරතුර වික්රමසිංහයන් හෑල්ලුවට ලක් කරමින් කළ ප්රකාශ ඇතුළත් වීඩියෝවක් ටික්ටොක් ඇතුළු විවිධ සමාජ මාධ්ය වේදිකාවල වේගයෙන් ප්රචාරය විය.
එම වීඩියෝ දර්ශනවලට අනුව මෙම ගුරුවරයා මාර්ටින් වික්රමසිංහයන්ව "මෝඩයෙකු" ලෙස හඳුන්වමින් ඉතා පහත් අන්දමින් විවේචනය කර තිබුණි. ගම්පෙරළිය වැනි සම්භාව්ය කෘතීන් කියවීමට සිසුන් තුළ කැමැත්තක් නොමැති බවත්, එවැනි නිර්මාණ කළ අයෙකු මහා ගත්කරුවෙකු ලෙස හඳුන්වන්නේ මන්දැයි තමන්ට නොවැටහෙන බවත් ඔහු එහිදී පවසා ඇත. පවතින අධ්යාපන ක්රමය තුළ අච්චු පොතේ ඇති කරුණු මත පදනම්ව වික්රමසිංහයන්ව වීරයෙකු කර ඇති බවත්, ඔහුගේ ලේඛන ශෛලිය රසවින්දනයට බාධාවක් බවත් පවසමින් ඔහු තවදුරටත් චෝදනා කළේය.
මෙම ගුරුවරයාගේ විවේචනය මාර්ටින් වික්රමසිංහයන්ට පමණක් සීමා නොවූ අතර සමස්ත සිංහල සාහිත්යය විෂය නිර්දේශයටද ඔහු දැඩි ප්රහාරයක් එල්ල කර තිබුණි. විශේෂයෙන්ම සම්භාව්ය සාහිත්ය කෘතියක් වන සැළලිහිණි සංදේශයේ එන කවි පවා විකෘති කරමින්, ඒවාට අසභ්ය වචන මිශ්ර කර ගායනය කිරීමෙන් ඔහු සිසුන් හමුවේ සාහිත්යය උපහාසයට ලක් කර ඇති ආකාරය එම වීඩියෝවෙන් දැකගත හැකි විය. සාහිත්යයේ අරමුණු පවා අශෝභන ලෙස විවේචනය කරමින් ඔහු සිදුකළ මෙම අත්තනෝමතික හැසිරීම විද්වතුන්ගේ මෙන්ම සාමාන්ය ජනතාවගේද දැඩි පිළිකුලට ලක්විය.
මෙම සිදුවීමත් සමඟ විවිධ පාර්ශ්වයන්ගෙන් එල්ල වූ දැඩි බලපෑම සහ විරෝධය හමුවේ අදාළ ගුරුවරයා පසුගිය 20 වනදා සිය ෆේස්බුක් ගිණුම ඔස්සේ සජීවීව සම්බන්ධ වෙමින් නිල වශයෙන් සමාව අයැද සිටියේය. මුදල් ගෙවා සම්බන්ධ වූ සිසුන් පිරිසක් වෙනුවෙන් පමණක් පැවැත්වූ සංවෘත පන්තියකදී විෂය කරුණක් පැහැදිලි කිරීමට ගත් උදාහරණයක් මෙලෙස වැරදි ලෙස ප්රචාරය වී ඇති බව ඔහු එහිදී සඳහන් කළේය. කෙසේ වෙතත් එම අවස්ථාවේදී තමන් අතින් නොහොබිනා වචන භාවිත වූ බව ඔහු පිළිගත් අතර, එම ප්රකාශය සම්බන්ධයෙන් තමන් කනගාටු වන බවත් මින් ඉදිරියට එවැනි වැරදි සිදු නොවන බවටත් ඔහු සහතික විය.
.jpg)
.png)
0 Comments