නැගෙනහිර දෙසින් හමා එන තරංගාකාර සුළං ප්රවාහයේ බලපෑම හේතුවෙන් දිවයිනේ උතුරු සහ නැගෙනහිර ප්රදේශවල දැනට පවතින වැසි සහිත කාලගුණික තත්ත්වය ඉදිරි දින කිහිපයේදීත් තවදුරටත් අපේක්ෂා කළ හැකි බව කාලගුණ විද්යා දෙපාර්තමේන්තුව නිවේදනය කරයි. හෙට (දෙසැම්බර් 18) දිනය සඳහා නිකුත් කරන ලද නවතම කාලගුණ අනාවැකියට අනුව, ප්රදේශ කිහිපයකට මිලිමීටර් 100 ඉක්මවූ තද වැසි ඇතිවීමේ අවදානමක් පවතී.
විශේෂයෙන්ම නැගෙනහිර, ඌව සහ මධ්යම පළාත්වලත්, පොළොන්නරුව දිස්ත්රික්කයේත් ඇතැම් ස්ථානවලට මිලිමීටර් 100 ඉක්මවන ඉතා තද වැසි ඇතිවිය හැකි බව කාලගුණ නිවේදනයේ සඳහන් වේ. මීට අමතරව උතුරු-මැද, නැගෙනහිර, ඌව සහ මධ්යම පළාත්වල විටින් විට වැසි ඇතිවිය හැකි අතර, උතුරු සහ වයඹ පළාත්වලද වැසි වාර කිහිපයක් ඇතිවීමේ හැකියාව පවතී.
දිවයිනේ සෙසු ප්රදේශවල තත්ත්වය සලකා බැලීමේදී, පස්වරු 1.00න් පමණ පසුව තැනින් තැන වැසි හෝ ගිගුරුම් සහිත වැසි ඇති විය හැක. මෙහිදී ඇතැම් ප්රදේශවලට මිලිමීටර් 50ට වැඩි තරමක තද වැසි ඇතිවිය හැකි බව කාලගුණ විද්යා දෙපාර්තමේන්තුව පෙන්වා දෙයි. වැසි සහිත තත්ත්වයට අමතරව මධ්යම කඳුකරයේ නැගෙනහිර බෑවුම් ප්රදේශවලත්, උතුරු, උතුරු-මැද සහ වයඹ පළාත්වලත්, ත්රිකුණාමලය, හම්බන්තොට සහ මොනරාගල දිස්ත්රික්කවලත් පැයට කිලෝමීටර් 40 ත් 50 ත් අතර වේගවත් තද සුළං ඇතිවීමේ ප්රවණතාවක් පවතී.
එසේම, සබරගමුව, බස්නාහිර සහ මධ්යම පළාත්වලත්, ගාල්ල සහ මාතර දිස්ත්රික්කවලත් අලුයම් කාලයේදී මීදුම් සහිත තත්ත්වයක් අපේක්ෂා කළ හැකි බැවින් රියදුරන් මේ පිළිබඳව අවධානයෙන් සිටීම වැදගත් වේ. ගිගුරුම් සහිත වැසි සමඟ තාවකාලික තද සුළං සහ අකුණු අනතුරු ඇතිවිය හැකි බැවින්, එවැනි අවස්ථාවලදී ආරක්ෂිත පියවර අනුගමනය කරමින් අනතුරු අවම කර ගැනීමට කටයුතු කරන ලෙස කාලගුණ විද්යා දෙපාර්තමේන්තුව මහජනතාවගෙන් වැඩිදුරටත් ඉල්ලා සිටී.
.jpg)
.png)
0 Comments